Ekkiland

Húsið nýþrifið og lítur út eins og ég eigi von á Hús og Híbýli í heimsókn. Það gerist u.þ.b. einu sinni á ári. Ég er ekki betri húsmóðir en það. Jonathan er á flugvellinum að sækja vinafólk okkar og svo ætlum við að fara út að borða í kvöld. Það verður gaman.

Sólin skín og vindurinn blæs - Blondie í geislaspilaranum. Ég vildi að ég væri umkringd ykkur öllum sem eru að lesa þetta blogg (og öllum hinum sem nenna ekki að lesa).

Ég fékk bréf frá Skeiðu Húla í dag og ég las það með áfergju. Það er alltaf jafn skemmtilegt að fá bréf, og sérstaklega frá henni. Tusind tak Heiða mín.

Jonathan finnst orðin eyrnapinni(ear pin) og stýripinni(stearing pin) óstjórnlega fyndin og því langar mig að biðja ykkur um að skrifa í kommentakerfið hjá mér ef ykkur detta fleiri samsett pinnaorð í hug (ég man nefnilega ekki fleiri).

Þar til síðar,

Svandís birti @ 17:33 0 Ummæli

Já, ég er að ritgerða. Ótrúlegt en satt. Og svo náttúrlega vantaði mig smá upplýsingar og þá varð ég að interneta og auðvitað endar maður þá á því að eyða mörgum dýrmætum stundum í að blogglestur og annað dútl sem hefur ekkert með ritgerð að gera.

Eitthvað virðist franska póstþjónustan vera treg. Ég sendi slatta af pósti til Íslands fyrir mánuði síðan og hann er ekki kominn (nema sennilega hefur pabbi fengið bréfið sem ég sendi honum). Vona bara að þetta skili sér á endanum.

Til hamingju Ísland með frækilegan sigur á Ítölum í gær. Nú er bara að taka stefnuna á heimsyfirráð.

Þar til síðar,

Svandís birti @ 15:32 0 Ummæli

Þær áttu afmæli í ágúst
Þær áttu afmæli í ágúst
Þær áttu afmæli, Berglind og Nanna
Þær áttu afmæli í ágúst.

Til hamingju með afmælið þann 7. ágúst stóra systir mín.
Til hamingju með afmælið þann 15. ágúst Nanna mín.

Já, þá er ég komin til baka frá Englandi eftir tveggja vikna dvöl á Hilton St. Ann's. Þar var gaman að vera og margt fólk að hitta og leika við. Það er nú frekar dauft að vera kominn aftur hingað í félagslega einangrun. En það er von á góðum gestum næstu helgi og verður meira og minna húsfyllir alveg þangað til ég kem heim til Íslands.

Jonathan þurfti að fara til Englands til að vinna og eins og venjulega fékk ég að fljóta með. Ég ætlaði að nota tímann til að ráðast á ritgerðina mína og var að vona að ég kæmist slatta áfram í henni. En það varð því miður ekki að raunveruleika. Ég sá um að pakka niður öllu nema tölvudótinu. Það sá Jonathan um því hann þurfti að finna til eitthvað dót vegna vinnunnar sem ég vissi ekkert um. Og það vildi ekki betur til en að hann gleymdi að pakka tölvunni minni sem þýddi að ég gat ekki gert neitt í ritgerðinni. Karlmenn *púff*. Annars er honum alveg fyrirgefið greyinu, ég fékk að fara í fullt af skoðunarferðum í staðin og fór til Windsor, Reading, London (loksins hef ég komið lengra inn í London en bara úthverfin) og Oxford. Og við fórum fullt út að borða og hittum margt skemmtilegt fólk og bara skemmtum okkur konunglega.

Við komum til baka á laugardaginn og þá var norsk vinkona mín komin til Montpellier. Hún var með mér á Frönskunámskeiðinu í Paul Valery. Ég eyddi sunnudeginum með henni. Við fórum upp að yndislegu vatni og eyddum deginum þar. Þetta er frábær staður þar sem hægt er að synda í vatninu, leigja kanóa og árabáta og stökkva af rosa hárri brú ofan í vatnið. Ég þarf sennilega ekki að taka fram að ég þorði ekki að stökkva ;) . Ég vildi að ég hefði haft myndavél með. Landslagið þarna er svo ótrúlega fagurt. Við fórum svo út að borða í Montpellier um kvöldið. Gaman gaman.

Nú á ég sumsé að vera að skrifa ritgerð. Hvað ætli ég hafi minnst oft á þessa árans ritgerð á þessari bloggsíðu. Og hvað ætli ég hafi skrifað margar blaðsíður eftir allt þetta tuð. Ekki margar. Það get ég sagt ykkur. Kannski best að hætta að tuða og tilkynna bara þegar sá ótrúlegi dagur rennur upp að ég útskrifast.

Á laugardaginn næsta koma Nik og Claire í heimsókn (Nik er besti vinur Jonathans). Þau ætla að vera í tvær vikur hjá okkur. Seinni vikuna erum við búin að leigja bát og ætlum að fara að sigla á Canal du Midi. Þar á eftir koma foreldrar Jonathans í heimsókn ásamt móðursystur hans og hennar eiginmanni. Það verður nú aldeilis stuð. Og svo kem ég heim. OGÉGGETEKKIBEÐIÐ. 34 dagar. Jei.

Takk fyrir afmælispakkann Heiða. Ég er ekkert smá glöð :D Nú þarf ég bara að hakka DVD spilarann okkar svo hann spili region 1 diska. Það getur ekki verið svo mikið mál. Mig vantar bara forritanlega fjarstýringu eða gsm-síma með infra-rauðu tengi. Því verður reddað !!!

Þar til næst,

Svandís birti @ 13:37 0 Ummæli